Cwblhawyd rhaglen waith er mwyn gwella'r cyfleusterau pysgota cymunedol ac er mwyn rheoli'r cynefin yng nghyffiniau cronfeydd Tanerdy, Caerfyrddin.

Agorwyd y pyllau ar eu newydd wedd yn swyddogol ar 16eg Mehefin pryd y cafodd disgyblion Canolfan Elfed, yn Ysgol Uwchradd y Frenhines Elisabeth, gyfle drwy'r cynllun ‘5 x 60’ i roi cynnig ar bysgota. Menter sy'n cael ei chyllido gan y Cynulliad yw ‘5 x 60' er mwyn ceisio sicrhau bod disgyblion uwchradd yn cael ‘5 x 60’ munud o weithgareddau corfforol bob wythnos. Roedd hyfforddwyr pysgota o Brosiect Pyllau Cwmoernant ac Ymddiriedolaeth Afonydd Sir Gaerfyrddin wrth law i roi hyfforddiant arbenigol.

Mae'r cyfleusterau newydd ar y safle yn cynnwys lle parcio pwrpasol i bobl anabl, gwell mynediad i bysgotwyr i'r llwyfannau pysgota, a meinciau newydd. Hefyd mae gwaith wedi ei wneud o ran teneuo'r coed, o ran rheoli chwyn yn y dyfroedd, ac o ran creu man agored newydd ar y pwll uchaf ar gyfer rhoi hyfforddiant pysgota. Er mwyn gwneud y pyllau'n fwy atyniadol i bysgotwyr gollyngwyd miloedd o bysgod bras i’r pyllau yn ystod y misoedd diwethaf.

Er taw gwella'r pyllau ar gyfer pysgotwyr yw'r brif flaenoriaeth, mae gwella'r cynefinoedd er mwyn hybu bioamrywiaeth yn un o'r amcanion hefyd. Trwy deneuo'r coed er mwyn i ragor o olau dydd gyrraedd y pyllau a thrwy adael pentyrrau o foncyffion hwnt ac yma, llwyddwyd i greu cynefin gwerthfawr i famaliaid bychain, amffibiaid, ac anifeiliaid di-asgwrn-cefn.

Y gobaith yw gwneud rhagor o waith i wella'r ardal ar gyfer bywyd gwyllt gan gynnwys gosod blychau nythu i adar a blychau i ystlumod ar goed. Hefyd mae prinder llystyfiant ar hyd cyrion y pyllau, sy'n gynefin gwerthfawr, felly byddai bwrw ati - gan gofio gofynion y pysgotwyr - i greu silffoedd bas ar hyd ymylon y pyllau a phlannu planhigion addas yn y mannau hynny, yn beth buddiol dros ben. Ar ben hynny, byddai'n ddefnyddiol pe byddai modd cyflwyno gwybodaeth am yr amrywiaeth o fywyd gwyllt sy'n defnyddio'r safle i'r llu pobl sy'n dod yno i bysgota.

Mae'r gwaith hwn wedi ei ariannu gan bartneriaeth sy'n cynnwys Cyngor Sir Caerfyrddin, Asiantaeth yr Amgylchedd Cymru, Ymddiriedolaeth Afonydd Sir Gaerfyrddin a Phrosiect Pyllau Cwmoernant.

Cost y prosiect oedd £42,000 gydag Asiantaeth yr Amgylchedd Cymru yn ariannu rhan o'r swm a hynny drwy ddefnyddio'r incwm y mae'n ei gael yn sgil gwerthu trwyddedau pysgota. Mae Asiantaeth yr Amgylchedd Cymru yn awyddus i sicrhau bod amrywiaeth o welliannau amgylcheddol yn y man hwn ochr yn ochr â chael rhagor o bysgotwyr i ddefnyddio'r cyfleusterau.

Y bwriad dros yr haf yw cynnal mentrau lleol i hybu pysgota ac i amlhau'r manteision cymdeithasol ac economaidd i'r gymuned leol yn sgil diddordeb pobl mewn pysgota.

Mae'r cronfeydd yn llecyn diddorol dros ben nid nepell o ganol y dref, a'r gobaith yw y bydd y prosiect yn rhoi hwb enfawr i ecoleg y pyllau hyn a'r cyffiniau ac yn sicrhau bod y bysgodfa yn fwy cynaliadwy.