Ers 30 o flynyddoedd, mae'r Gymdeithas er Gwarchod Adar (RSPB) wedi bod yn gofyn i bobl gyfrif yr adar sy'n eu gerddi. Yn ystod y cyfnod hwn mae'r cyhoedd wedi treulio mwy na 3 miliwn o oriau (dyna fwy na 380 o flynyddoedd!) yn gwylio ac yn mwynhau'r adar sy'n ymweld â'n gerddi, gan lwyddo i gofnodi rhyw 6 miliwn o adar bob blwyddyn.

Mae Gwylio Adar y Gerddi cyn bwysiced, os nad yn bwysicach, yn awr nag erioed o’r blaen, gan fod y canlyniadau gan chwarter miliwn o bobl (ac o 280,000 o erddi) yn helpu'r RSPB i lunio 'ciplun' o niferoedd adar ym mhob rhanbarth, gan ddangos sut mae niferoedd rhai o'n hadar yn lleihau mewn modd arswydus.

Rydym wedi colli mwy na hanner adar y to a thri chwarter ein drudwy, ac yn ddiamheuaeth mae canlyniadau'r arolygon wedi helpu i amlygu'r colledion syfrdanol hyn.

Felly mae'r arolygon hyn yn ein helpu i sylwi ar broblemau ond hefyd, ac yn bwysicach byth, maent yn ein galluogi i gymryd y camau cyntaf o ran ceisio helpu rhywogaeth i adennill tir.

Ond mae'n rhaid cofio bod Gwylio Adar y Gerddi yn hwyl, yn rhwydd ac yn cymryd dim ond awr o'ch amser.

Cynhelir yr arolwg ym mis Ionawr am fod y tywydd yn oer, sy'n golygu bod adar yn fwy tebygol o ddod i'r gerddi i chwilio am fwyd a chysgod.

Dim ond am awr rydych yn gorfod cyfrif, a gallwch wneud hynny ar unrhyw adeg o'r dydd, ond byddwch yn gweld mwy o adar os codwch yn fore! Nid yw'r adeg o’r dydd yn effeithio ar y canlyniadau cyffredinol am fod y gwahaniaethau o ran niferoedd adar yn cael eu cysoni gan fod cynifer o erddi dan sylw yn yr arolwg.

Cofiwch anfon eich gwybodaeth atom hyd yn oed os nad oeddech wedi gweld dim adar. Mae popeth yn cyfrif, hyd yn oed os nad oedd dim adar wedi ymddangos ichi eu cyfrif yn ystod yr awr. Wrth ddadansoddi arolygon mae'r hyn nad yw yno cyn bwysiced â'r hyn sydd yno. Mae rhai pobl yn gweld llai o adar nag arfer yn ystod eu hawr, ac mae pobl eraill yn gweld mwy nag arfer – felly maent yn gwrthbwyso ei gilydd.

Yr wyth aderyn mwyaf niferus yn Sir Gaerfyrddin yn ôl arolwg y llynedd oedd:

1. Drudwen
2. Aderyn y To
3. Titw Tomos Las
4. Ji-binc & Mwyalchen
5. Titw Mawr   
6. Robin Goch & Jac-y-do
7. Turtur Dorchog
8. Titw Penddu

Yr adar mwyaf niferus yn gyffredinol yn ôl arolwg y llynedd oedd:

1. Aderyn y To
2. Drudwen
3. Mwyalchen
4. Titw Tomos Las
5. Ji-binc
6. Ysguthan
7. Turtur Dorchog
8. Titw Mawr
9. Robin Goch
10. Titw Cynffon-hir

Mae rhagor o wybodaeth am yr arolwg ar gael ar y wefan ganlynol: www.rspb.org.uk/birdwatch/lookfor/